Udhërrëfyes për BSB

Çfarë është BSB

Bizneset dhe profesionistët shqiptarë — në Shqipëri, Kosovë, Maqedoni dhe në diasporë — gjenden mes tyre në një vend të vetëm.

Nuk është rrjet social dhe as thjesht regjistër. Është të dyja: gjendesh kur të kërkojnë, dhe gjen kur kërkon — furnizues, bashkëpunëtorë, staf.

Tetë seksionet

Secili ka një qëllim të veçantë. Nuk ke nevojë t'i përdorësh të gjitha. Në çdo seksion, butoni Si funksionon pranë titullit e shpjegon hap pas hapi.

Si nis

1. Krijo llogari

   Me email ose me Google. Falas, dhe zgjat më pak se një minutë.

2. Zgjidh llojin e profilit

   Biznes për kompani të regjistruar, Profesionist për shërbim individual, Përdorues për të shfletuar. Zgjedhja përcakton çfarë publikon dhe si shfaqesh në kërkim.

3. Plotëso profilin

   Emri, kategoria, qyteti, përshkrimi, logoja. Nuk është formalitet: kush e hap profilin duhet të kuptojë brenda pak sekondash çfarë bën dhe si të kontaktojë — përndryshe kalon te tjetri.

4. Publiko

   Një postim, një ofertë te Tregu, një event ose një shpallje Partner/Staf. Të gjitha falas.

5. Ndiq çfarë ndodh

   Paneli privat tregon kush e pa profilin dhe kush kliko kontaktin — pjesa që shumica nuk e shfrytëzon.

Paneli privat

Pasi hyn, butoni Panel Privat të çon te hapësira jote e punës. Aty është gjithçka që nuk e sheh publiku.

• Statistikat — sa herë është parë profili, nga cilat qytete, dhe si ka ndryshuar javë pas jave.
• Sinjalet — kush e hapi profilin, kush kliko telefonin, kush ruajti ofertën. Një klikim mbi kontaktin do të thotë dikush ishte gati të të shkruante. Informacioni më i vlefshëm i platformës.
• Përmbajtja jote — postimet, ofertat, eventet dhe shpalljet në një vend, me mundësi redaktimi dhe fshirjeje.
• Mesazhet — biseda private me klientë dhe bashkëpunëtorë, brenda platformës.
• Vlerësimet — çfarë kanë shkruar klientët, dhe mundësia për t'u përgjigjur.
• Të ruajturat — çdo gjë që ke shënuar për ta parë më vonë.

Si të gjejnë klientët

Kërkimi brenda platformës

Shiriti lart kërkon njëkohësisht në biznese, profesionistë, oferta, evente dhe postime. Poshtë tij janë filtrat: rajoni, shteti, qyteti, kategoria dhe sektori. Ata mbeten aktivë ndërsa lëviz mes seksioneve.

Google dhe motorët e kërkimit

Pjesa që shumica nuk e di: çdo profil, ofertë dhe event ka faqen e vet publike, të shkruar që Google ta kuptojë — me të dhëna të strukturuara, vendndodhje dhe kategori.

Praktikisht, dikush që kërkon një shërbim në qytetin tënd mbërrin te profili yt pa e ditur që BSB ekziston. Sa më i plotë profili, aq më shpesh.

Faqet sipas kategorisë dhe qytetit

Përveç profileve, ekzistojnë faqe si "kontabilistë në Tiranë" ose "ndërtim në Prishtinë". Ato mbledhin bizneset dhe profesionistët e asaj fushe në atë vend — dhe janë ndër faqet që gjenden më shpesh nga jashtë.

Reklama dhe promovime

Dy gjëra të ndryshme, që shpesh ngatërrohen.

• Reklama — një banner që shfaqet në hapësirat anësore ose brenda rrjedhës së postimeve. E sheh kushdo që viziton atë faqe, edhe pa llogari.
• Promovimi — ngritja e një postimi, oferte ose profili në krye të listës së vet. Nuk shton audiencë të re; e bën më të dukshme te ata që tashmë po shfletojnë atë seksion.

Reklama krijohet nga paneli privat. Promovimi nis nga menuja ⋮ mbi kartën tënde në listë — zgjidh „Promovo”. Të dyja janë të hapura për këdo dhe nuk kërkojnë plan me pagesë.

Gjatë periudhës së provës promovimi është falas, me një promovim aktiv në çdo seksion. Artikulli i promovuar del në krye të listës me shenjën „Promovuar” deri në datën e mbarimit; promovimi i një eventi mbaron kur mbaron eventi.

Siguria dhe të dhënat

Llogaria jote

Fjalëkalimi ruhet i enkriptuar me algoritëm modern — as ne nuk mund ta lexojmë. Hyrja mbrohet me kufizime kundër tentativave të përsëritura, dhe sesioni yt ruhet në mënyrë që të mos jetë i arritshëm nga skriptet në shfletues.

Çfarë sheh secili

Profili yt publik shfaq atë që ke zgjedhur të shfaqet. Statistikat dhe sinjalet i sheh vetëm ti. Mesazhet janë private mes dy palëve.

Te komunitetet ku lejohet postimi anonim, emri yt nuk shfaqet te askush — as te administratori i komunitetit. Ai ruhet në sistem dhe mund të shihet nga ekipi i BSB-së vetëm nëse postimi raportohet.

Moderimi

Çdo postim dhe koment mund të raportohet. Administratori i një komuniteti mund ta fshehë menjëherë nga publiku, por vendimin përfundimtar — heqje ose rikthim — e merr ekipi i BSB-së. Kjo ndarje ekziston me qëllim: askush nuk duhet të jetë gjyqtar në rastin e vet.

Të dhënat e tua

Nuk i shesim. Mund t'i shkarkosh ose ta fshish llogarinë në çdo moment. Detajet janë te Politika e Privatësisë.

Pse u ndërtua

Bizneset shqiptare janë të shpërndara në dhjetëra vende, dhe shpesh dy kompani që mund të bashkëpunonin nuk e dinë se ekzistojnë.

Informacioni jeton në grupe rrjetesh, lista private dhe rekomandime gojë më gojë — dhe humbet. Postimi zhduket pas një jave, grupi mbyllet, kontakti ikën me telefonin.

BSB u ndërtua që ajo punë të mbetet. Një profil i plotësuar sot gjendet edhe pas dy vjetësh, nga dikush që kërkon pikërisht atë që ti ofron.